គន្លឹះក៏ដូចជាបទពិសោធន៍ជាច្រើន ក្នុងវិស័យស្ថាបត្យកម្ម ត្រូវបានបង្ហាញនិងចែករំលែក នៅក្នុង «វេទិកាដំណើរវិវត្តន៍នៃស្ថាបត្យកម្ម» ពីរៀមច្បង ដល់យុវជនជំនាន់ថ្មី ដែលកំពុងចាប់ក្តីស្រមៃជាស្ថាបត្យករ ក្នុងប្រទេសកម្ពុជា ។
នៅក្នុងកិច្ចសំភាសន៍ផ្ទាល់ជាមួយ INN President នាថ្ងៃទី១៩ ខែមីនា ឆ្នាំ២០២៣ នៅមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) លោក សេង សុវណ្ណារ័ត្ន បានឱ្យដឹងថា៖ «គោលបំណងនៅក្នុងថ្ងៃនេះ គឺយើងចង់ឱ្យសាធារណជនស្គាល់យើងច្រើនជាងមុន ហើយដើម្បីឱ្យគេស្គាល់យើងច្រើន លុះត្រាតែយើងនៅក្នុងវិស័យស្ថាបត្យកម្មនេះ ស្ថាបត្យករត្រូវស្គាល់គ្នាជាមុនសិន ។ ដូចនេះគោលបំណង គឺធ្វើឡើងដើម្បីឱ្យបងប្អូនដែលរៀនផ្នែកនេះ បានជួបគ្នា ពិភាក្សាគ្នា និងចែករំលែកបទពិសោធន៍ឱ្យគ្នាទៅវិញទៅមក និងលើកទឹកចិត្តឱ្យគ្នាផងដែរ ទើបបង្កើតបានជាសហគមន៍ដែលខ្លាំង និងយើងអាចឱ្យជាតិរបស់យើង ស្គាល់ពីវិស័យរបស់យើងនិងគោលបំណងធំរបស់យើង យើងចង់ឱ្យវិស័យស្ថាបត្យកម្មអាចឈានជើងចូលទៅឆាកអន្តរជាតិបាន» ។
លោក សេង សុវណ្ណារ័ត្ន បន្តថា ៖ «តាមការសង្កេតឃើញរបស់ខ្ញុំផ្ទាល់ ខ្ញុំគិតថាបច្ចុប្បន្នក្នុងប្រទេសកម្ពុជាយើង កំពុងត្រូវការស្ថាបត្យកម្ម ត្រូវការគម្រោងនៃទីក្រុង ត្រូវអ្នកឌីហ្សាញ សូម្បីតែអ្នកត្រូវការហាងកាហ្វេមួយឬផ្ទះមួយ ក៏អ្នកខ្លះគាត់ត្រូវការអ្នកគូរប្លង់ឱ្យគាត់ដែរ ។ ដូចនេះ ខ្ញុំគិតថាវិស័យនេះនឹងរីកចម្រើនទៅមុខ អាចនិយាយបានថា ចាប់ពី ៥ ឆ្នាំទៅមុខវិស័យនេះ ក្នុងប្រទេសកម្ពុជានឹងរីកចម្រើនកាន់តែធំ» ។
លោក សុវណ្ណារ័ត្ន ក៏បានលើកទឹកចិត្តដល់យុវជន បន្តក្តីស្រមៃនិងចាប់យកជំនាញណាក៏បាន ក្នុងវិស័យស្ថាបត្យកម្មនេះ ប៉ុន្តែត្រូវរៀនជំនាញឱ្យច្បាស់លាស់ និងចូលរួមក្នុងការគិតមួយ ថាធ្វើមិចដើម្បីឱ្យគេយល់ពី តម្លៃនិងការងាររបស់យើង ប៉ុន្តែយើងជាស្ថាបត្យករនឹង យើងត្រូវឱ្យតម្លៃខ្លួនឯងជាមុនសិនដែរ ព្រោះវិស័យស្ថាបត្យកម្មវាជាសិល្បៈមួយ ដូចនេះវាមានទម្រង់ផ្សេងៗគ្នាច្រើន អញ្ចឹងប្រសិនយើងដាក់ចិត្តស្រឡាញ់ក្នុងវិស័យនេះហើយ ត្រូវតែប្រឹងប្រែងឱ្យខ្លាំង ។ អ្នកនៅក្នុងវិស័យនេះប្រាកដជាដឹងថា វានឹងប្រឈមនឹងបញ្ហាជាច្រើនប៉ុណ្ណា ដូចនេះអ្នកសិក្សាផ្នែកនេះទាមទា ដាក់ចិត្តខ្លាំងណាស់ ។
គួរបញ្ជាក់ផងដែរថា កម្មវិធី «វេទិកាដំណើរវិវត្តន៍នៃស្ថាបត្យកម្ម» គឺជាកម្មវិធី ជំនួបរវាង យុវជនដែលជាកំពុងសិក្សាផ្នែកស្ថាបត្យកម្ម ជួបជាមួយវាគ្មិននិងអ្នកពិភាក្សាយោបល់ ដែលមានចំនួន ៨ រូប ដោយពួកគាត់សុទ្ធសឹងតែជាស្ថាបត្យករ និងស្ថាបនិកឆ្នើម ទៅលើស្នាដៃ សមិទ្ធផល នៃស្ថាបត្យកម្ម ដែលមានការគាំទ្រច្រើនពីមហាជន មកចែករំលែកបទពិសោធន៍ ក៏ដូចជាឆ្លើយតបទៅនឹងសំនួរជាច្រើន ដែលប្អូនៗកំពុងមានចំងល់ក្នុងវិស័យស្ថាបត្យកម្មនាពេលបច្ចុប្បន្ន ៕ អត្ថបទសហការ ដោយ កោះសន្តិភាព
